Matthew 14

Ioane Baptista Ega Mae Fouga

(Mako 6:14-29; Luka 9:7-9)

1Ega'ina alogai kin Herod Kalilea ago e'ima lopiaga Iesu fouga elogo. 2Ke ega pinauga au'i epaini'i einaka, “I'ina auga Ioane Baptista maeai emaunimue. Ega kainai mirakulo isapu'i isa faagagai kepinauga,” eoma.

3Herod ega eifa oma, gome isa Iesu fouga aelogo koa kai, isa ifo akina Filip akafa Herodias eakafania puogai Ioane Baptista eafiia egopeisa tipulai epaagua. 4Gome Ioane Baptista isa epainia einaka, “Oi ifomu akimu akafa loakafania auga keifa apua kai lokapaisa,” eoma. 5Ioane tipulai eagu alogai, Herod isa gaaupugua eoma kai papiau emani'iaini'i, gome papiau Ioane profeta keomaisa.

6Kai Herod ega mauni kina miamiaga ekapaisa aisama, Herodias gauga ifiaoga emai isa ma'oai ago'iai egefa, ke Herod alo epagama alogaina. 7Ega kainai Herod ifiao ega'ina maagai epako'ania eifa, kapa'ina mo agegoina auga agepenia eoma. 8Ke ifiao ega'ina, ina isa kapa'ina fegoina eoma maagai eifania auga Herod maagai eifania einaka, “Lau anina laani Ioane Baptista kania litiai gakauka gamai maisa laoma,” eoma. 9Ega aisama kin Herod alo emafu alogaina kai ega pako'a iifaga kainai, ke ega la'afou au'i kai'iai, ifiao kapa'ina egoina auga gaikapa eoma. 10Ke ega au au'i kelao Ioane tipulai eaguega kai aiso kefoua. 11Ke litiai kania kepakauka kemaiseina ifiao imagai kepaaua, ke ifiao eafiia elao ina epeniia. 12Ke Ioane Baptista ega imoi au'i kemai isa imaauga keafiia kelao kefufunia. Egae kai kelao Iesu maagai Ioane emae auga fouga keifania.

Iesu Papiau 5000 Epaaniani'i

(Mako 6:30-44; Luka 9:10-17; Ioane 6:1-14)

13Iesu kapa'ina emia auga fouga elogo aisama, ogefakeai gaagai eaguka ekailai afu oapuga aga'o elao. Ke papiau isa ala elao auga fouga kelogo aisama, taoniai kepealai la'afouai ife'iai isa muninai kelao. 14Iesu gaagai eake ke la'afou papiau'i eisa'i aisama, gua'i eani alogaina, ke keisafa au'i epafelo'i.

15Ke epagapigapi emaiseina aisama, ega imoi isa eega kemai kepainia keinaka, “I'ina afuga oapuga ipauma, ke pau epagapigapi efua. La'afou mopakanina ega koa fekelao paguai ifo'i e'i fo'ama aga'o feke'afa fekeania,” keoma.

16Kai Iesu isa epaini'i einaka, “Isa afu aga'o afakelao. Kai oi isa kapa aga'o amopeni'i kegaania,” eoma.

17Ega aisama Iesu ega imoi isa kepainia keinaka, “Lai eemaisai palafa ima ke ma'a gua mo kekae,” keoma.

18Ke Iesu einaka, “Amoafi'i amomaiseini'i,” eoma. 19Ke papiau epaini'i mukimukiai kegaagukipo eoma. Ke papiau keagukipo aisama, palafa ima ke ma'a gua fou eafii'i ufa eakae penia Deo maagai tenkiu eifania, efaiponi'i kai ega imoi epenii'i ke'eaisa papiau kepenii'i. 20Ke papiau ma'oai keaniani alo'i ekainia. Ke keaniani afegai, Iesu ega imoi palafa ame'afu'i ke isa kepua'afuni'i au'i fou kepakai guguaini'i ale'a 12 ake'i kepapogu'i. 21Papiau egae keaniani au'i, au mo kepaauni'i auga, au'i ma'oai mo 5000 koa i'opoga kai, imoi ke papie fou auga akepaauni'i.

Iesu A'u Laagai Epea

(Mako 6:45-52; Ioane 6:15-21)

22Egae kai Iesu la'afou epakanina alogai, fiakoa mo ega imoi epaini'i gaagai keaguka keufai kepagai apie kelao. 23Ke Iesu la'afou epakanina afegai, ifogamo elao iku mapegai emegamega. Ke epa'umina emaiseina aisama, ifogamo ipauma ega'ina afugai eapa. 24Kai isa ega imoi au'i gaagai kelao a'u ipuainagai. Ega'ina alogai goiso emai isa keaguka gaagaga eauniia elaomo emai. Ke gaaga felao auga aekainia epaafipugu alogaini'i, gome ameku gaaga eaoapua.

25Ke gani eegai, Iesu a'u laagai epea isa ee'i elao. 26Ke Iesu ega imoi isa a'u laagai epea keisa aisama, keagaga keinaka, “Isage,” keoma, ke oge'i egea puo keagagapea.

27Kai Iesu fiakoa mo isa epaini'i einaka, “Alomi gakapula! Folomani'i, i'ina lau,” eoma.

28Ke Peto einaka, “Lopia, ko'a oi koa aisama, mopainiau fei laagai mapea eemu mafai,” eoma.

29Ke Lopia einaka, “Mai,” eoma.

Ega aisama Peto gaagai eapaopu fei laagai epea Iesu eega elao. 30Kai ameku epua eisa aisama, emani'i ke e'ina ekogo alogai eagaga einaka, “Lopia, kaniau moagamauga,” eoma.

31Ega aisama Iesu fiakoa mo ima ekalaisa Peto eafiia ke epainia einaka, “Pako'a e'ele aumu. Kapa puo eeuai opomu lopama'o?” eoma.

32Ke isa gaagai ke'agaukae aisama, ameku eapakipo. 33Egae gaagai keaguka au'i isa ega koa ekapaisa keisa aisama, keau afagaina keinaka, “Iifa ko'a, oi Deo gauga paisa,” keoma.

Iesu Kenesaret Agogai Isafa Papiau'i Epafelo'i

(Mako 6:53-56)

34Ke kepagai kelao apiegai aisama, Kenesaret taoninai keofau. 35Ke ega'ina ago au'i Iesu kaisau auga keisa felo aisama, iifa keulaisa taoni ega'ina eegai keagu papiau'i ma'oai aina'i kepalogo. Ke ega'ina papiau'i isafa au'i ma'oai Iesu eega kemaiseini'i. 36Ke kegoinia isafa papiau'i galogoaini'i afe tiapuga kua mo kegaafi opogaina keoma. Ke ma'oai isa keafi opogaina au'i felo'i kemia.